ஒரு நபர் கமிட்டி கருத்து கேட்பு

அரசு  ஊழியர், ஆசிரியர் ஊதிய முரண்பாடு ஒரு நபர் கமிட்டி இன்று கருத்து கேட்பு

அரசு ஊழியர்கள் ஆசிரியர்கள் ஊதிய முரண்பாடுகளை களைய அமைக்கப்பட்ட ஒரு நபர் கமிட்டியிடம், சங்கங்கள் இன்று நேரில் ஆஜராகி தங்கள் கருத்துகளை பதிவு செய்கின்றனர்.

அரசு ஊழியர்கள் ஆசிரியர்கள் கூட்டமைப்பின் சார்பில் கடந்த 7 ஆண்டுகளாக பல்வேறு கோரிக்கையை முன்வைத்து போராட்டம் நடத்தப்பட்டது.

இந்நிலையில் 7வது ஊதியக் குழுவின் பரிந்துரையின் படி நிர்ணயம் செய்யப்பட்ட ஊதியத்தில் முரண்பாடுகள் இருப்பதால் அவற்றை களைய வேண்டும் என்று கேட்டனர்.

அத்துடன் பழைய ஓய்வு ஊதிய திட்டம் கொண்டு வர வேண்டும், புதிய ஓய்வு ஊதிய திட்டத்தை ரத்து செய்ய வேண்டும், இடைநிலை ஆசிரியர்கள் மற்றும் தொகுப்பு ஊதியத்தில் பணியாற்றுவோர் பிரச்னைகளை தீர்க்க வேண்டும் என்றும் கோரிக்கை வைத்து போராட்டத்தை தொடர்ந்து வந்தனர்.

கடந்த 8ம் தேதி கோட்டை நோக்கி முற்றுகை போராட்டம் நடத்தினர். போலீசார் ஜாக்டோ-ஜியோ அமைப்பிரை கைது செய்தனர். இந்த சம்பவம் பெரும் பரபரப்பை ஏற்படுத்தியது.

இந்நிலையில், ஊதிய முரண்பாடுகளை களைய, நிதித்துறை செலவினப் பிரிவு செயலாளர் சித்திக் தலைமையில் அமைக்கப்பட்ட ஒருநபர் கமிட்டியில் ஜாக்டோ-ஜியோ வினர் தங்கள் கருத்துகளை தெரிவிக்க வேண்டும் என்று அரசு தரப்பில் கூறப்பட்டது.

இதையடுத்து, ஜாக்டோ-ஜியோ அமைப்பினர் தலைமைச் செயலகத்தில் ஒரு நபர் கமிட்டியில் மனு கொடுத்தனர். இதன் பேரில் அனைத்து சங்கங்களை சேர்ந்தவர்களுக்கு ஒருநபர் கமிட்டியில் இருந்து அழைப்பு விடுக்கப்பட்டுள்ளது.

தலைமைச் செயலகத்தில் 2வது மாடியில் உள்ள ஒரு நபர் கமிட்டியில் இன்று சங்கப் பிரதிநிதிகள் நேரில் ஆஜராக உள்ளனர். ஒரு சங்கத்தின் சார்பில் 5 பேருக்கு மிகாமல் ஆஜராக வேண்டும் என்று தெரிவிக்கப்பட்டுள்ளது. இந்த கருத்து கேட்பில் கலந்து கொள்ள உள்ள சங்கங்களுக்கு வெவ்வேறு தேதிகளில் அழைப்பு விடுக்கப்பட்டுள்ளதால் ஒரு வாரத்துக்கு இந்த கருத்து கேட்பு நடக்கும் என்று எதிர்பார்க்கப்படுகிறது.