மக்கள் தொகை கணக்கெடுப்பு - 2021

2021 மக்கள் தொகை கணக்கெடுப்பு - செல்போன் செயலி பயன்படுத்தப்படும். இப்பணி உலகின் மிகப்பெரிய பணியாக இருக்கும்.2021 மக்கள் தொகை கணக்கெடுப்புக்கான செயல்திட்டம் மற்றும் வினா பட்டியல் குறித்து தரவு உபயோகிப்பாளர் மாநாட்டில் ஆலோசனை

இந்தியாவில் 140 ஆண்டுகளாக மேற்கொள்ளப்பட்டு வரும் மக்கள் தொகை கணக்கெடுப்பு பணியில் முதன்முறையாக, புள்ளி விவரங்கள் அனைத்தும் செல்போன் செயலி மூலமாக பெறப்படவுள்ளதென இந்திய மக்கள் தொகை பதிவாளர் அலுவலக அதிகாரிகள் தெரிவித்துள்ளனர். 2021ஆம் ஆண்டு மக்கள் தொகை கணக்கெடுப்புக்கான செயல் திட்டம் மற்றும் வினாப்பட்டியலை இறுதி செய்வதற்காக, புதுதில்லியில் இன்று நடைபெற்ற தரவு உபயோகிப்பாளர் மாநாட்டில் பேசிய அதிகாரிகள், மக்கள் தொகை கணக்கெடுப்பு பணியில் ஈடுபடவுள்ள கணக்கெடுப்பாளர்கள், அவரவர் சொந்த செல்போனை பயன்படுத்த ஊக்குவிக்கப்படுவார்கள் என்று தெரிவித்தனர். இதற்காக அவர்களுக்கு உரிய தொகை வழங்கப்படும் என்றும் தெரிவிக்கப்பட்டது. இதுதவிர, கணக்கெடுப்பாளர்கள் காகித அட்டவணைகள் மூலமாக புள்ளி விவரங்களைப் பெற்று அதனை மின்னணு படிவத்தில் சமர்ப்பிக்க வகை செய்யப்படும் என்றும் மாநாட்டில் தெரிவிக்கப்பட்டது.
2021 மக்கள் தொகை கணக்கெடுப்புப் பணி உலகின் மிகப்பெரிய பணியாக இருக்கும் என்று குறிப்பிட்ட மத்திய உள்துறை செயலாளர் திரு. ராஜீவ் கவ்பா, கணக்கெடுப்புப் பணியில் 33 லட்சம் பணியாளர்கள் ஈடுபடுத்தப்படவுள்ளதாகவும் இதற்கான அறிவிப்பு ஏற்கெனவே வெளியிடப்பட்டுவிட்டதாகவும் தெரிவித்தார். ஜம்மு-காஷ்மீரிலும் ஹிமாச்சல் பிரதேசம் மற்றும் உத்தராகண்ட் மாநிலங்களின் பனிப்பிரதேசங்களிலும் 2020 அக்டோபர் ஒன்றாம் தேதியை அடிப்படை நாளாகக் கொண்டு கணக்கெடுப்புப்பணி தொடங்கும் என்றும் நாட்டின் பிற பகுதிகளில் 2021 மார்ச் 1ஆம் தேதியை அடிப்படை நாளாகக் கொண்டு இந்தப்பணி மேற்கொள்ளப்படும் என்றும் அவர் தெரிவித்தார். மக்கள் தொகை கணக்கெடுப்பு என்பது மனித தலைகளை கணக்கெடுப்பது மட்டுமல்ல என்று குறிப்பிட்ட திரு. ராஜீவ் கவ்பா, கொள்கை வகுத்தல் மற்றும் வளங்களை ஒதுக்கீடு செய்வதற்கு தேவையான சமூகப் பொருளாதார புள்ளி விவரங்களை திரட்டுவதாகவும் இருக்கும் என்றார்.  நாட்டின் பொருளாதார வளர்ச்சி மற்றும் மக்கள் நலத்திட்டங்களை உருவாக்குவதற்கும், மக்கள் தொகை கணக்கெடுப்பு விவரங்கள் உதவிகரமாக இருக்கும் என்றும் அவர் கூறினார்.
இவை தவிர, தொகுதி மறுவரையறை மற்றும் எஸ்.சி.எஸ்.டி பிரிவினருக்கான தொகுதி ஒதுக்கீடு போன்ற அரசியல் சாசன தேவைகளுக்கும் இந்தப் புள்ளி விவரங்கள் உதவிகரமாக இருக்கும் என திரு. ராஜீவ் கவ்பா தெரிவித்தார்.
மாநாட்டில் வரவேற்புரையாற்றிய  இந்திய தலைமைப் பதிவாளர் மற்றும் மக்கள் தொகை ஆணையர் திரு. விவேக் ஜோஷி, 2021 மக்களவை கணக்கெடுப்பு இரண்டு கட்டங்களாக நடைபெறவுள்ளது என்றார். முதற்கட்டமாக, 2020 ஏப்ரல் முதல் செப்டம்பர் வரையிலான கால கட்டத்தில் மாநில அரசுகளால் தேர்வு செய்யப்படும் ஏதாவது இரண்டு மாதங்களில் வீடுகள் கணக்கெடுப்புப் பணி மேற்கொள்ளப்படும். இரண்டாம் கட்டமாக, மக்கள் தொகை கணக்கெடுப்பு பணி 2021 பிப்ரவரி 9 முதல் 28 தேதி வரையிலும், திருத்தப்பணிகள் 2021 மார்ச் ஒன்றுமுதல் மார்ச் ஐந்தாம் தேதி வரை மேற்கொள்ளப்படும் என்றும் திரு. விவேக் ஜோஷி குறிப்பிட்டார்.
ஜம்மு-காஷ்மீரிலும் ஹிமாச்சல் பிரதேசம் மற்றும் உத்தராகண்ட் மாநிலங்களின் பனிப்பிரதேசங்களிலும் 2020 செப்டம்பர் 11 முதல் 30ஆம் தேதி வரையிலும், திருத்தப்பணிகள் 2020 அக்டோபர் ஒன்று முதல் ஐந்தாம் தேதி வரை மேற்கொள்ளப்படும் என்றும் அவர் தெரிவித்தார்.